عشان وقتنا محدود أثناء التدريب، حقولك على كام نقطة مهمة تساعدك تحقق أقصى استفادة من التدريب في كل مرة:

• قبل أي حاجة تأكد أن كل التكنيكات اللي بتتعلمها في المنهج هي تكنيكات فعالة ١٠٠٪ وتم اختبارها على مر السنين مع خصوم مختلفين من قبل عائلة جريسي، ولو حابب تشوف دا بنفسك ادخل اتفرج على فيديوهات تحديات جريسي في سبعينات القرن الماضي وعلى فيديوهات هويس جريسي وهو بيتغلب على كل خصومه في بطولات UFC 1, UFC 2, UFC3, وغيرها…
• مدربك وظيفته يحافظ عليك وعلى سلامتك وصحتك وينقل لك العلم اللي انت جاي تتعلمه، لذلك عشان تقدر تستفيد واجب عليك تلتزم بتعليمات المدرب وتلتزم بمعايير السلامة اللي بيحددها المدرب.
• زميلك في التمرين هو أهم واحد معاك في الكلاس لذلك لازم تاخد بالك منه ومن سلامته، وتساعده يتعلم التكنيك لو محتاج مساعده او محتاج اي تقويم انت تقدؤ تساعده بيه.
• لو في فيديو على قناة الاكاديمية للتكنيك اللي حتتعلمه النهاردة يفضل انك تتفرج عليه قبل ما تيجي، وأثناء الكلاس تركز كويس مع كلاب المدرب، ولو معاك النوتة بتاعتك تدون كل ملاحظاتك وكل النقاط المهمة اللي قالها المدرب، ولما تروح تتفرج على التكنيك تاني فيديو.
• أثناء الكلاس وانت بتنفذ التكنيك التزم بتنفيذ التكنيك بالطريقة اللي قالهالك المدرب تحديداً، وفي المرات الأولى لتعلم التكنيك خلي مقاومتك بنفس المستوى اللي بيحدده المدرب، يعني لو المدرب طلب منك عدم المقاومة نهائياً في الاول دا لأن المدرب عايز التكنيك يتحول لرد فعل تلقائي الأول، بعدها حيطلب منك تزود مستوى المقاومة واحدة واحدة، حسب خبرتك وحسب اتقانك للتكنيك.
• في العادة المدرب بتاعك مش حيسمح للناس الجديدة انها تعمل سبارنج sparring الا بعد ما تزيد خبرتهم شوية حفاظاً على سلامتهم وحفاظاً على سلامة اللي حيلعب معاهم.
• الجوجيتسو تكنيكاتها كتير وخطوات كل تكنيك كتير لذلك حتتطلب منك صبر عظيم، ودا اللي بيفرق لاعب عن التاني.
• لو المدرب سمح لك تعمل سبارنج او فلو مع حد من زمايلك (خاصة في كلاس المبتدئين) متستخدمش تكنيك من خارج المنهج او تكنيك انت لسة ماخدتهوش لأن دا غير مسموح، الافضل انك تبقى شاطر وتستغل السبارنج دا وتستخدم التكنيكات اللي اتعلمتها ولو معرفتش تنفذها تبدأ تشوف المشكلة فين وتشتغل عليها.
• لو زميلك جه ينفذ معاك تكنيك وانت خرجت منه (بدون ما تكون اخدت الكلاس بتاع الكاونتر \ الدفاع \ الهروب) يعني خرجت بشكل عشوائي، فتأكد إن دا مش لأنك شاطر، لكن دا لسبب من اتنين: إمام زميلك عنده من اللطف والحكمة ما يكفي انه ميسببلكش أذى، أو أن زميلك منفذش التكنيك صح، أو لأن الوضع مش متوقع منك انك تنفذ اي مقاومة او هروب وانت نفذت حاجة في غير محلها.
• كل تكنيك من تكنيكات الجوجيتسو ليه توقيت وزاوية وسرعة عشان يتنفذ بيها بشكل صحيح، لذلك لما يكون المدرب لسة بيعلمكم التكنيك في المرة الأولى، وزميلك جاي ينفذ التكنيك معاك وانت تقاومه وتبوظ التكنيك دا مش عشان انت جامد…دا عشان انت مش فاهم لسة يعني ايه (أوكي Uke) الخصم اللي بيتنفذ معاه التكنيك، ودا بيكون مطلوب منه في البداية انه يساعد زميله (التوري Tori) اللي بينفذ التكنيك عشان ينف٫ كل خطوة في التكنيك بشكل صحيح وويتم التكرار كتير بنفس الشكل الصحيح بينهم لحد ما يتم اتقان التكنيك وبعدها في الغالب المدرب بيسمح بالمقاومة واختبار تنفيذ التكنيك، لذلك يجب الالتزام بتعليمات المدرب عشان تستفيد انت وزميلك.